Athaikonacatvāriṃśaḥ paṭalavisaraḥ
Technical Details
athaikonacatvāriṃśaḥ paṭalavisaraḥ |
athakhalu bhagavāṃ śākyamuniḥ punarapi śuddhāvāsabhavanamavalokya sarvāṃśca lokadhātuṃ buddhacakṣuṣā sarvasattvānāmavalokya punarapi mañjuśriyaṃ kumārabhūtamāmantrayate sma | asti mañjuśrīḥ ! tvadīyamantratantramudrāpaṭalavisare sarvalaukikalokottarasamayamaṇḍalānupraviṣṭe sāmānyāvidhānacaryānirhāre samanupraveśasattvāmāśraye acintyāceṣṭita sarvamantrāṇāṃ sarvamudrāṇāṃ sarvamaṇḍalānāṃ sarvasattvānāṃ sarvamantrānupraviṣṭānāṃ nidhānanirdeśacaryā samāsato vyācakṣate tacchrūyatām ||
athakhalu mañjuśrīḥ kumārabhūto bodhisattvo mahāsattvaḥ bhagavataścaraṇayornipatya adhyeṣayati sma | adhyeṣayatu me sugataḥ asmākamanukampāyai lokasyānugrahāya | tad bhaviṣyati mahato janakāyasyārthāya hitāya sukhāya lokānukampāyai | tad vadatu me sugata ! sarvamantrāṇāṃ japahomaāpyāyanapūjananiyamasarvatantramudreṣu samayapraveśānunigamasādhanopayikavidhānaṃ sarvamaṇḍaleṣu sarvalaukikalokottaravidhiviśeṣaṇopayikapaṭalavisaram|
evamukte bhagavāṃ mañjubhāṇī tadantaramabhūt sarvajña vānyaṃ tūṣṇīṃ tasthau tadantaram ||
tuṣṭaḥ mañjuravo dhīraḥ sugatajña pratīcchayam |
sarvabuddhāśca sarvatra sarvadhātusamāgatā ||
bodhisattvāstu sarve vai sarvaśrāvakakhaḍgiṇaḥ |
sarvasattvā tridhā ye ca anādibhavacakrake ||
nibaddhā yonijā ye ca gatipañcasuyojitā |
sarvabhūtagaṇādhyakṣā rākṣasoragamānuṣā |
daityadānavayakṣāśca kūṣmāṇḍakaṭapūtanā |
devamukhyā gaṇādhyakṣā mātarāśca maharddhikāḥ ||
sarve grahagaṇā loke candrasūryā parestathā |
brahmendradhanadā rudrā viṣṇuskandavirūḍhakā ||
dhṛtarāṣṭrakuberāśca sarve vai vasavastathā |
sarvabhūtāśca sarvatra sattvadhātusamāśritāḥ ||
śubhāśubhaphalai karmaiḥ nibaddhā gatisūtrake |
muktāmuktaśca sarvatra āgatā samaye sthitāḥ ||
buddhādhiṣṭhānabalā ṛddhyā śṛṇvanteha tridhā sthitāḥ |
śubhayonijasambhūtā aśubhaiścaiva svakarmabhiḥ ||
śṛṇvante sarvabuddhā vai śuddhāvāsapure tadā |
tadā dharmaṃ saugataṃ cāryaṃ agradharmaśubhodayam ||
mantramudratridhāyuktaṃ niyataṃ cāpi kīrtitam |
kṣemaṃ śivatamaṃ mārgaṃ āryāṣṭāṅgikaṃ tadā ||
tridhā karmapathaṃ śreṣṭhaṃ nirvāṇapuragāminam |
dānaśīla tadā dhyānaṃ tṛdhā mārgopadeśitam ||
bhagavānuvāca sarvajña mantramārgāṅgapravartanam |
īṣasmitamukho dhīra mañjughoṣaṃ nirīkṣa ca ||
vākyaṃ ca śubhayā yuktaṃ idaṃ brahmaravo tadā |
śṛṇvanto bhūtagaṇāḥ sarve sthitā saumyā viśāradāḥ ||
mā vo samayād bhraṃśo bhaviṣyati anarthakam |
ahitaṃ dīrgharātraṃ vo buddhavākyamajānakāḥ ||
pratiṣyatha tamasyandhe vatsa dūrībhaviṣyatha |
idaṃ vaḥ śreyase yuktā mantramudrā samīritāḥ ||
kariṣyathā sadā lokā sadānugrahanigraham |
manyathā matkriyāyuktaṃ krodho vai ca yamāntakaḥ ||
kariṣyati na sandehaḥ sadā nigrahatāṃ yuge |
ādau puṣpābhikīrṇe vai vivikte vijane sadā ||
kartavye maṇḍale buddhyā dhyānenāvarjya sarvataḥ |
ādau ca sarvabuddhānāṃ padmaṃ dhyāyīta buddhimām ||
dvitīyaṃ padmamudyantaṃ arkasyaiva mahādyutim |
tatrastho mañjuvaraḥ śrīmāṃ kumārākāracihnitaḥ ||
pañcacīrakamūrdhāno jānukarṇakakorparaḥ |
phalitaḥ kṛtāñjalipuṭo bālo pṛcchantaṃ sugataṃ vidum ||
vācaṃ ca śubhayā yuktāṃ vadanto sugatālaye |
yo vai sarvabuddhānāṃ mahāpadmaṃ sphaṭikodbhavam ||
vaidūryamayaṃ padmaṃ kiñjalkaṃ hemajodbhavam |
mahāmarakatīnālāṃ karṇikāṃ saha hemajam ||
mahāviṭapasaṃghātaṃ mahāratnavibhūṣitam |
padmarāgamayaiḥ kalikaiḥ anekākārasubhūṣitaiḥ ||
aśmagarbhamayairdivyaiḥ aṅkuraiśca vibhūṣitam |
padmaṃ munivare dhyātvā mahoccaṃ gaganāśritam ||
tasmānnyūnataraṃ padmaṃ samacihnaṃ suśobhanam |
tanmanaḥ dhāmato dhyāyenmantrī pratyekārhaśrāvakām ||
tasmānnyūnataraṃ padma tṛtīyaṃ cittena yatnadhīḥ |
caturthaṃ padmamāvartaṃ tasmāddhrasvatamaṃ viduḥ ||
dhyāyīta pañcamaṃ padmaṃ hrasvāhrasvatamaṃ sadā |
samākārasamodyotaṃ vyomaṃ saṃsthitasarvatam ||
kuryāt tasya vido padmaṃ cittayā saptage sthitam |
vajrapāṇeḥ tathā padmaṃ udayantaṃ raveryathā ||
dakṣiṇena vidoḥ padme tathā mañjuravaḥ sadā |
tato hrasvataraṃ padmaṃ lokīśasya mahātmanaḥ ||
tṛtīyaṃ padmamityeva samantadyotilābhine |
caturthaṃ padmamityeva akṣayapratibhānatā ||
īṣid vimalagate hrasvaṃ kamalaṃ pañcamatattvite |
tasmāt ṣaṣṭhatamo yo padmaḥ āryaṃ cādharmasaṃjñitam ||
adhaścaiva samantād vai udadhiṃ cāpi cintayet |
mahānāge'rdhaniryānto'nantaḥ nandopanandakau ||
sarvaśvetā mahānāgāḥ sarvālaṅkārabhūṣitāḥ |
abdhorjātā smitamukho gaganālambanadṛṣṭayaḥ ||
saptaśīrṣamahābhogo maṇikuṇḍalabhūṣitā |
puruṣākāradivyāstu ardhabhogoragastathā ||
saptasphaṭā sasaumyāstu ardhacakṣurgatordhvārmā |
vāmato munivarā padme pañcamuṣṇīṣasaṃsthitām ||
cakravarti tathādyantāṃ śakrāyudhasutejitām |
ekākṣaraścakravartistejorāśiḥ sitonnataḥ ||
abhyunnato jayoṣṇīṣavidyārājamaharddhikaḥ |
vajrapāṇiśca yakṣeśaḥ adhaścaiva sucintayet ||
eteṣu cittaṃ dhīmāṃ rūpibhiḥ sarvadā sadā |
ātmanaśca dhiyo yukto mantravinmantrarāḍ jame ||
tatrasthaṃ niyamasthaṃ vai padmapatropaviṣṭa vai |
dhyāyīta adhaścātmānaṃ paryaṅkenopaviṣṭa vai ||
sarvapāpāṃśca deśī munināmantike sadā |
tatrastho niyamajo rūṣī adhyeṣya munivarāṃ varām ||
dharmacakrānuvartantāṃ tiṣṭhantāṃ sugatātmajām |
teṣāṃ puṇyamatulam anumodyeva jāpadhīḥ ||
suśuklamālatīkusumāṃ punnāgaṃ nāgakesarām |
campakāśokatilakāṃ tagaryāṃścaiva samallikām ||
kṣipet puṣpāñjaliṃ divyāṃ savyāṃścaiva suśobhanām |
sabhūtāmapyabhūtāṃ vā dhiyā yuktāṃ suśobhanām ||
vividhāṃ pūjāvarāṃ kuryurvidyā ca iva manoramām |
vividhāṃ dhūpavarāṃścaiva tathā gandhānulepanām ||
citteneva tu tat kuryāt sabhūtā madhyabhāvataḥ |
nivedya valimantrairvai pradīpāṃścaiva tadā nyaset ||
vividhākārasampannā vicitraścitrabhojanām |
anekākārasampannāṃ dadhyodanamaśālikām||
yabagodhūmamudgaiśca khādyabhojyasubhūṣitaiḥ |
nivedya sugate bhavatyā dadyāccātmānameva tu ||
tathyena nānyathā cāpi citta yenāpi śiṣyate |
eṣā śraddhā mayā pūjā sarvapūjeṣu śiṣyate ||
maṃ dhyātvā jāpinaḥ sarve niyataṃ bodhimavāpnuyāt |
saphalā mantrasiddhiśca jāyate ca na saṃśayaḥ ||
ihaiva janma niḥsattvā sidhyante mantradevatā |
anyajanmāntare vāpi kecit siddhyanti mānavāḥ ||
vicitrāṃ bhogasampattiṃ viśeṣāṃścāpi puṣkalām |
vividhā kālamanovāg dhyānaṃ cāpi tridhā purā ||
buddhairbuddhaśataiścāpi pratyekārhaśrāvakaiḥ |
triḥprakārā tathā bodhiḥ prāpnuvanto yaśasvinaḥ ||
etaistriprakāraistu mantrasiddhirihoditā |
triprakāraistu sattvākhyai uttamādhamamadhyame ||
tridhā karmasamuddiṣṭam |
praṇītaṃ dhyānatāṃ proktaṃ madhyamaṃ śīlajaṃ smṛtam ||
kanyasaṃ dānajaṃ mukhyaṃ taccaiva tu punastridhā |
praṇītaṃ dharmadānaṃ tu madhyamaṃ tu gataṃ tathā ||
vākyamāmipadānaṃ tu kanyase va tu kīrtyate |
śīlaṃ cāpi tridhā proktamityuvāca muniḥ purā ||
buddhatvapariṇāmākhyaṃ agryaṃ śīlamiti smṛtam |
pratyekabodho madhyaṃ tu kanyasaṃ śrāvakodbhavam ||
etallokottaraṃ śīlaṃ laukikaṃ tu prakathyate |
taccāpi trividhā jñeyaṃ sāsravotpattikāraṇam ||
mumukṣubuddhibhirbhaktyādhijñaptyā abhijñasambhavā |
śreṣṭhā jyeṣṭhatamā loke kathyante ṛṣivaraiḥ sadā ||
etadagramayaṃ loke śīlamāhurmanīṣiṇaḥ |
madhyamaṃ devaja jñeyaṃ kanyasaṃ tu nṛpadvarām ||
taccāpi triprakāraistu tridhā karmeṣu yojitaiḥ |
tridhā ca trividhaiścaiva punarmuktaṃ tridvisaptapañcaśaḥ ||
trisaptaṃ saptatiṃ taccāpi tridhā bhinnam |
prādurbhūto'ṅkuro'ṅkurāḥ dhyānajaṃ caivamatyanto ||
sureśvarau punaḥ trīṇi punaraṣṭāṣṭabhūṣitam |
yathaiva pūrvanirdiṣṭaṃ dhyāneṣveva ca kathyate ||
evaṃ taraṅgavad bhinnaṃ punarjvāleva gacchati |
budbudākāravad jñeyaṃ kṣaṇotpattiprabhaṅguram ||
evamevādyaprayogena śatadhā bhidyate punaḥ |
sahasraśaśca sadā jñeyamasaṃkhyeyādyalakṣitam ||
sādhyate dhyānajaṃ karma agryaṃ mānasodbhavam |
tasmād dhyānavataṃ mantraṃ cittaṃ bodhāya nāmitam ||
ayanenaiva te siddhiṃ lapsyante mantradevatām |
tasmāt sarvaprayatnena jāpibhiḥ siddhilipsubhiḥ ||
kartavyā mānasī pūjā buddhānāṃ sarvataḥ sadā |
ihaiva janmani siddhiṃ nityaṃ dhyānaratasya tu ||
sarvatrāpratihato hyeṣa dhyānajo śīlasaṃvaraḥ |
dānato vibhavo dharmaḥ śīlato suravarodayam ||
utpattidhyānādānā śrave |
etat saṃkṣepato hyuktaṃ jāpināṃ mantrasiddhayai ||
yaṃ budhvā mantriṇaḥ sarve kṣipramantreṣu siddhaye |
kṣipraṃ cānuttarāṃ bodhiṃ prāpnuvanti na saṃśayamiti ||
bodhisattvapiṭakāvataṃsakānmahāyānavaipulyasūtrāt āryamañjuśriyamūlakalpāt
saptatriṃśatimaḥ mahākalparājapaṭalavisarād uttamasā-
dhanopayikasarvakarmārthasādhanatattveṣu
prathamaḥ dhyānapaṭalavisaraḥ
parisamāpta iti |